Yr Athro Brendan Cropley yw Pennaeth y Ganolfan Ymchwil Pêl-droed yng Nghymru. Mewn cydweithrediad â Chymdeithas Bêl-droed Cymru, nod y Ganolfan yw hyrwyddo, hwyluso a chynnal ymchwil amlddisgyblaethol i bêl-droed er mwyn cefnogi arfer gorau mewn perfformiad, datblygiad a lles chwaraewyr, addysg hyfforddwyr, cyfranogiad, ac iechyd. Mae ei ymchwil hefyd yn canolbwyntio'n ehangach ar ddatblygu arfer proffesiynol mewn gwahanol ddisgyblaethau, yn benodol hyfforddi chwaraeon a seicoleg chwaraeon. Mae'r diddordebau hyn yn cynnwys archwilio gwerth a gwella llwybrau addysg a datblygiad.

Ystyrir yr Athro Cropley yn eang fel arbenigwr ymchwil ym maes ymarfer myfyriol a’r potensial sydd ganddo i ddatblygu arfer effeithiol a hwyluso ffyniant dynol. Yn fwy diweddar, mae wedi datblygu rhaglenni ymchwil llwyddiannus ym meysydd datblygu sgiliau bywyd trwy chwaraeon a seicoleg perfformiad mewn hyfforddwyr ac athletwyr fel ei gilydd gan ganolbwyntio ar iechyd meddwl a lles. Mae’r Athro Cropley wedi cyhoeddi dros 60 o lawysgrifau a phenodau llyfrau, gan gyfrannu at gyhoeddiadau sy’n arwain y byd ym meysydd hyfforddi chwaraeon a seicoleg chwaraeon.